<$BlogRSDURL$>

David
Skotlando, United Kingdom
Rigardu mian profilon

Friday, May 25, 2012

PIV rete finfine 

Post longa atendado Plena ilustrita Vortaro de Esperanto nun estas alirebla rete. La projekto ankoraŭ estas beta, sed ŝajne fukcias bone. Mi estas denaske pigra; kaj sendube rigardos la grandiozan vortaron ekrane pli ofte ol fizike! Registriĝu senpage (kvankam donacoj eblas) ĉe vortaro.net

Tuesday, December 13, 2011

Eŭropa Unio kaj Eŭropo 

La diferenco en la titolo estas grava; mi ekzemple estas eŭropano sed mi ne treege entuziasmas pri la Eŭropa Unio. Mi ne estas unika; multaj laŭdas eŭropan kulturon sed subtenas la Union kun malmulte da entuziasmo. Jes, ĝi havas atingojn, sed ĝi ne estas radikala, avangarda organizo. Jes, ĝi prizorgas grandajn aferojn; sed ĝi ankaŭ tro dekretas pri etaĵoj. Ĉu ĝia ekzisto garantias kontinentan pacon? Espereble jes. Ĉu ĝi estas burokratisma? Laŭ mi tro. Ĉu la Eŭrozono estas bona koncepto? Por kelkaj landoj, sed ne por ĉiuj. Ĉu la Eŭropa Unio estas modelo de demokrateco? Tute ne! Ĉu la Zono nur saviĝos kiam kelkaj malfortaj landoj eksiĝos el la klubo? Laŭ mi jes, ĉar gravaj eraroj okazis pri la membraro., kaj necesas agnoski tion kaj ne papece defendi la decidojn de la pasinteco. Jes, la Eŭropa Unio estas neperfekta institucio kiun mi subtenetas; sed Eŭropaneco mi subtenegas mense kaj kore!

Saturday, November 26, 2011

Novaj mondoj! 

Mi ne aludas al astronomio, ĉar ĝi ne estas mia fako. Mi aludas al la manio pri modifoj precipe en informteknologio. Oni alkutimiĝas al metodiko kaj ĝi sanĝiĝas! Ne temas pri malgrandaj plibonigoj; temas pri radikala aliformigo.

Antaŭnelonge Fajrfokso renoviĝis: bone, nebone - mi ne certas. Nun Yahoo Mail estas transformita; mi ne povas trovi iom! Kaj Gmail nun sekvas la saman padon. Ve, ve. Deviga dumviva lernado!

Ĉu la afero akrigos mian menson. Eblete. Sed pli verŝajne ĝi malrapidigos miajn labor-rutinojn.

Tamen, estas terura ebleco: mi fariĝas konservativa kaj kontraŭas progreson!








Sunday, November 13, 2011

Aŭtuno ankoraŭ aŭtunas 

La pasintan jaron en Skotlando vintro frue alvenis; ĝi estis severa sed ne tro longedaŭra.

Ĉi-jare aŭtuno estas milda, kaj suno ne mankas.

Tamen, la vintra inkubo ŝvebas ĉie.

Ĉu  la normo de antaŭaj jaroj alvenos kun ventoj el la Atlantko aŭ ĉu Nordio atakos la landon denove?

Ĉi-vespere ĉio estas en ordo; tamen, duboj troviĝas ĉe mi, kaj mi studas la prognozon iom nervoze.

Tamen, Esperantistoj ĉiam esperas!

Saturday, October 22, 2011

Alexander Danko ludas 

Kun plezuro mi sciigis vin pri YouTube apero de Alexander Danko la mondfama akordionisto kaj multjara Esperantisto. Li kelkfoje konceris en Skotlando kaj nun loĝas en Berlino. Mi laste renkontis lin antaŭ 18 monatoj.
Lia teknika lerteco estas daŭre rimarkinda!

Wednesday, August 17, 2011

Perdo de amiko 

Estas malfacile akcepti la ne-ĉeestadon de mia longtempa amiko, Jack Casey.

Li estis bastiono de la skota movado.

Li amis nian lingvon, kaj ĉiam eltrovis novajn perlojn.

Li partoprenis multajn esperantajn aferojn, sed lia koro ĉiam troviĝis en la Glasgova klubejo; ĝi, por li, vere, estis Esperantujo.

Lia morto ne estis surprizo; sed ni pli kaj pli konscios pri la signifo de la perdo dum la venontaj monatoj kaj jaroj.

Estis privelegio koni tian homon!

Sunday, July 17, 2011

Kongresen 

Vendredon mia edzino kaj mi veturos aviadile al Kopenhago por partopreni la Universalan Kongreson.

Tiuj kongresoj kompreneble estas unikaj; kaj oni estas plena de anticipo.

Mia duobla celo estas esperantumi kaj ankaŭ ekscii pli pri Danlando kaj ĝia ĉefurbo.

Nuntempe la planado atingas klimakson!

This page is powered by Blogger. Isn't yours?